श्रीशीशा राई
अई तुलसीप्रसाद पाण्डे यावा,
अङका छे मना ङे
अङ्का छे साक्मा सोन्मा आ ङे
हङ्ङाङा ओ
बान आ हेक्टुम नालो
अङहोक्वा दाङका
अङको छे हालापाकपाक ओ ङे
ह लोन
खानानिन छे मन्दिरा दा तखारिन की
कुनाहुद्दा एम्मायङ ओ लुङ ङे
तखत्तुमयोम फेक्वा, चाक्वा ओन्की हालानुन आ
साया ठुङ्याङ्सा सेवा तमेत्तुमयोम
मेन खानानिन देत्निकी झझवा तइन्येन ?
अङ्का वा ह आ लुङ खत्ङाङा हिदा
देत्निकी खा खिजेतमुन्येन ?
खानानिन लुङ्दा तठुङ्सिनचिनयेन ओ बेन
अङका वाइवेत युङ्ङाङा
देकीनालो अङ्का मिन्ङाङा–
मो को आम्नो मिचिनङ ओ
मो को आम्नो तोक्मायु ओ
मेन खानानिन अङ्को मिचिनङ
तुप्मा निम्पाङ तमिन्नानमिनियेन
घेन्मक तपाक्निङनी
खानानिन आम्नो मिन्मा वाटनी चमा तसनयेन नालो
अङ्को छे आप्पी ओ थाप्सङ,
आप्पी ओ मिन्मायु
आप्पी ओ तोक्मायु
एनानुम पाण्डया–
अङका छे हाङ ङे
अङका माङखिम ओ दियुङ्लादा युङ्ङा ओ
दियुङ्ला हुद्दा सुम्काटेट लुङ
मठुङसाओ युङयाङ
पाखालुङ– पापा ओ सुन्तुम चि काबुत
माखालुङ– आमा ओ सुन्तुम चि कासिन
साम्बेलुङ– कुटुम्बा ओ सुन्तम चि काखाङ
साप्टेन, नामछर, बाखा, सिखा पुक्खा
झाराक ओ निम्पाङ अङ्को चुलालुङ
आम्नो ‘तीर्थधाम’ नालो अङको चुलालुङ
खोन्कीङे अङ्का लुङ खत्ङा,
सेवा मेत्ङा
पाण्डे यावा ! खानानिन लो देकिना ?
अई यावा पाण्डया !
बानानिन्
चुलालुङ दा मुमायङ ओ खाबात दुङ्चि ने
चुलालुङ दा भाङमायङ ओ लाङसा सोत्चु ने ।
......
२०८० पुस ७
तरहरा
