धरान, पुष २८ । धरान ८, बरगाछीस्थित शहिद स्मृति माध्यामिक विद्यालयका विद्यार्थीहरुलाई आइतवार स्वेटर वितरण गरिएको छ ।
विद्यालयमा आयोजित एक कार्यक्रममा धरान राउण्ड टेवल संस्थाले विद्यार्थीहरुलाई निःशुल्क रुपमा स्वेटर वितरण गरेको हो ।
कक्षा नर्सरीदेखि ५ सम्मका गरिब तथा विपन्न परिवारका १ सय २५ जना विद्यार्थीहरुलाई स्वेटर वितरण गरिएको संस्थाका अध्यक्ष निमेश अग्रवालले जानकारी दिनुभयो ।
जाडोको समयमा पनि विद्यार्थीहरुको पठनपाठनलाई सहज र नियमित बनाउन सहयोग पुगोेस् भन्ने उद्धेश्यले स्वेटर वितरण गरेको अग्रवालको भनाई रहेको थियो ।
संस्थाले यसरी नै विभिन्न सामुदायिक विद्यालयहरुमा सहयोग गर्दै आएको छ । आगामी दिनमा पनि आवश्यकता र ठाउँ अनुसार सहयोग गर्दै जाने अध्यक्ष अग्रवालले वताउनुभयो ।
विद्यालयका प्रधानाध्यापक रामबहादुर विष्टले विद्यालयलाई सहयोग गरेकोमा आभार व्यक्त गर्दै धन्यवाद ज्ञापन गर्नुभएको थियो ।
यसरी नै स्कुलको भौतिक पूर्वाधार लगायत अन्य कुराहरुमा पनि सहयोग गर्न अन्य संघसंस्थालाई उहाँले आव्हान गर्नुभयो । विद्यालय व्यवस्थापन समिति सदस्य भोला श्रेष्ठको अध्यक्षतामा सम्पन्न कार्यक्रमको सहजीकरण विद्यालयका शिक्षक राजन वनले गर्नुभएको थियो ।
.......................
