धरान : झापा, सुनसरी र उदयपुर जिल्लामा एकै दिन शनिवार भएको सवारी दुर्घटनामा ४ जनाको मृत्यु भएको कोशी प्रदेश प्रहरी कार्यालय विराटनगरले जनाएको छ ।

उदयपुरको त्रियुगा-१० बोक्सेमा बा.प्र. ०१-००६ ख ५८७१ नम्बरको हाईस गाडीले ठक्कर दिँदा बाट पैदल यात्री त्रियुगा-११ का ५५ वर्षीय परनसेर राईको मृत्यु भएको छ ।

ठक्करबाट गम्भीर घाइते राईलाई उपचारको लागि जिल्ला अस्पताल पुर्‍याएको थियो । उनको उपचारको क्रममा मृत्यु भएको हो ।

झापा कन्काई-८ लक्ष्मीपुरमा पूर्व पश्चिम लोकमार्गमा ना ४ च ४०८४ नम्बरको छोटा हात्ती गाडीले ठक्कर दिँदा बाटो काट्दै गर्दै गरेका ६५ वर्षीय गर्बसिंह राईको मृत्यु भएको छ । ठक्करबाट गम्भीर घाइते राईको उपचारको क्रममा बिर्ता सिटी अस्पतालमा मृत्यु भएको हो ।

सुनसरीको इनरुवा-६ पूर्व पश्चिम लोक मार्गमा ९३ वर्षीय अमरबहादुर अधिकारीलाई नम्बर नखुलेको गाडीको ठक्करबाट मृत्यु भएको छ। ठक्करबाट गम्भीर घाइते अधिकारीलाई इनरुवा अस्पताल पुर्‍याएपछि अस्पतालमा मृत्यु भएको हो ।

हरीनगर-४ को भित्री सडक खण्डमा का। १ ख ६४३१ नम्बरको टिफरले ठक्कर दिँदा साइकल यात्री देवानगंज–७ का ५० वर्षीय झलु उरावको घटनास्थलमै मृत्यु भएको प्रहरीले जनाएको छ ।